كثر الحديث في الفترة الاخيرة عن اهمية السفر وان الواحد يحوش ويسافر وسافر انت لست شجرة وحقيقى الكلام فيه جزء كبير صحيح والسفر بيفرق مع الواحد ويساعده يتعرف علي نفسه بشكل افضل ويحسن من مهاراته . السفر المرة دي مختلف شويه والموضوع كبير فخليني احاول الخص كلامي في نقاط عشان محدش يزهق
- رحلة الحج مش لوالدك ووالدتك بس ( مش لكبار السن او اللي خلاص خلص كل حاجة) الرحلة اصلا مهما سافرت في درجة سياحية فيها مشقه وتعب ولغايه سنين مش بعيدة قوي كان الشباب هما اللي بيسافروا ( ابو جدي سافر علي جمل ) يمكن بس في الفترة الحالية مشكلة الاستطاعه المادية بقت اكتر من الاستطاعة البدنية
- الحج رحلة روحية رائعه لو عرفت تجهزله مضبوط وتذاكر كويس انته مسافر ليه ومحتاج ايه
- بعد ما توصل هناك مش حتبقي انسان رائع مرة واحده ولا وشك حيطلع نور بالليل ( انا اسف) الرحلة والمناسك بتساعدك توصل لكن مفيش حاجة حتلمسها حتتحول. بمعنى المفروض تذاكر وتستعد كويس عشان تقدر تحقق افضل ما يمكن من الرحلة والمناسك
- شرح المناسك وحتعمل ايه حتلاقيه وحتلاقي مشاريخ تشرحوه افضل منى اكيد لكن انا هنا بكملك عن احساسك لما توصل مكه وتنزل تعمل عمرة. عن احساسك لما تشوف الكعبة اول مرة ولك دعوة مستجابة اول ما تشوفها . عن طوافك حول الكعبة وتفتكر ان مكان ما انته تطوف كان الرسول عليه الصلاة والسلام بيطوف وكان بيخطب في اصحابه … العمرة بتجيلك زي دش سريع اول ما توصل بعد سفر طويل …انته تعبان لكن مبسوط جدا وعايز تكمل تخلص طواف وتصلي ركعتين خلف مقام ابراهيم وتفكر ازاي الامتثال لامر الله واليقين يوصل بحد انه يسكن ذريته اللي جه بعد سنين كتير في وادى غير ذى زرع وبعدين تشرب من زمزم وتشرب تاني وثالث وكتير …السعى ما بين السفا والمروة ….انته تعبان خلاص وعايز تريح شويه مع انك جاي بطيارة ومكمل اهلك مطمن عليهم و لسه شارب زمزم والصفا والمروة ممهدين مش جبلين زي زمان وكمان انته عارف انهم 7 اشواط بس … تفتكر هنا ان السيدة هاجر كانت بتسعى عطشانه وطفلها بيعيط من العطش واللي حولها جبال وقفر وكمان مش عارفه حتفضل تسعى لحد امتى لكن عندها ايمان ويقين ان ربنا معاها وموجود .. حتخلص وتحلق او تقصر حتحس انك علي المستوى الروحي والجسدى انسان مختلف فعلا
- ايام في مكه علي حسب رحلتك كل اللي شاغلك فيها انك تلحق الصلاة في الحرم وانك تقرأ قران … حتقابل ناس كتير من كل حته جايين بس لنفس السبب …حتلاقي اللي ماسك مصحف مكتوب فيه 3 مقاطع : مقطع بالقران بالعربي ومقطع القران مكتوب صوتي بلغته و مقطع مكتوب القران مترجم عشان يفهمه … ومع هذا حتلاقيه بيحاول وبيقرأ ويبص عليك ويحسدك علي انك عارف تقرأ القراءن لوحدك ومن مرة واحده وفاهم المعني ولو مش فاهم سهل تعرفه بسهولة… نعم مش حاسس بيها ولا فكرت فيها قبل كدا … حتى نعمه انك مولود مسلم ونعمه انك عرفت توصل هنا. حتلاقي اهل خير كتير بتحاول تساعد وحتلاقي مجالس علم واطعام طعام و افطار صائمين …حتشوف خير كتير وبرضو حتشوف ناس مش كويسه عشان تعرف ان حتى وانته في افضل بقاع الارض احنا لسه مش في الجنة وتفهم ان حتى والرسول صلي الله عليه وسلم موجود هنا كان فيه منافقين وفيه اهل شر
- يوم التروية يبدأ الحج فعليا … حتلبس الابيض كالكفن مهما غلى ثمنه وتمشى حاسر الرأس …. الكل سواء تبدأ تتعلم ليه اسمه يوم التروية وليه منى و ايه اللي في عرفه وتروح من منى لعرفة وتفضل اليوم كله تدعى لغايه ما تغرب الشمس انته تعبت مهما كنت قاعد في تكييف ومخيم حلو ومع كدا مش عايز اليوم يخلص وتحس انك كان ممكن تعمل احسن من كدا ( تفتكر ان دا نفس اللي بيقوله الميت لكن انته لسه عايش وعندك فرصه تبدأ من جديد وتعمل فعلا احسن من كدا ) حتغرب الشمس ويخلص اليوم … حيقولولك ان اول ذنب حيتكتب لك هو انك شكيت ان ربنا سبحانه وتعالى لم يغفر لك و حتحمد ربنا علي الرحلة والتوفيق وحتكمل لمزلفة ومنها لمنى . مزدلفة مستقر مؤقت عايز تكمل الرحلة منه بسرعة وعايز توصل لكن ربنا بيقولك فاذكروا الله عند المشعر الحرام فبتقف وتدعى وتبيت او تقضى جزء من الليل (اقامه مؤقته بتديك احساس ان دا زي القبر وكأنك بتتجهز ليوم الحشر والمشى علي الصراط ولله المثل الاعلى ) وتطلع منه لمنى اول يوم العيد بتكبيرات منك ومن اللي حواليك تعبان جدا لكن مبسوط ومستبشر… ماشى علي جسر الجمرات والناس كتير حواليك وترمى الجمرات وتبدأ ايام التشريق . منى ليها وضع خاص … وادى مميز جدا … المكان اللي تمثل فيه الشيطان لسيدنا ابراهيم يحاول انه يثنيه عن ذبح ابنه وسيدنا ابراهيم في كل مرة يصده … المكان اللي كانت بتتجمع فيه قبائل العرب قبل الاسلام في الحج ( ايوه كان فيه حج قبل الاسلام حتحتاج تقرأ عنه ) ودا المكان اللي الرسول صلى الله عليه وسلم بدأمنه دعوة العرب واللي بسببه قريش قاطعته وعزلوه واهله واصحابه في شعب ابي طالب. منى هي المكان كمان اللي بايع فيه الانصار رسول الله صلى الله عليه وسلم اول مرة وفيه مسجد اسمه مسجد البيعة هناك في المكان دا . مع كل دا منى مكان صعب لكل الناس … الاقامة فيه مهما كانت ميسرة الا انها خيام وخلطه عاليه مع الناس وبعد التحلل كل الناس بتحس ان الحج خلاص خلص وكله تمام وتبدأ المشاكل وساعات الخناق ولما ترجع تلاقى ربنا قال في الايام دي اذكروا الله كذكركم ابائكم او اشد ذكرا ودا لان العرب زمان كانوا بيقعوا في منى يتفاخروا بانسابهم وابائهم فربنا قالهم خلوا ذكر الله هو الاكثر والاشد وكأن ربنا سبحانه بيدينا درس ان بعد ما ترجع من عبادة وصلاح حتلاقي الدنيا وحتلاقي الناس بتجري فيها و تجمع و تتفاخر فخلي بالك وما تنساش ذكر الله وما تنساش العبادة وما ترجعش زي الاول ابدا . منى درس كبير واعداد عالي للرجوع لمشاغل الدنيا وبتطلع منها علي طواف الوداع وكلك شوق حتى قبل ما تمشى … يا رب ارجع هنا تاني قريب …يا رب يا تري حرجع تاني ولا دي اخر مرة
- مقدمة طويلة علي رحلة روحية لكن عشان اسهل عليك نصيحتي ليك انك تروح بدري( كل ما كنت صغير وبصحتك كل ما كان احسن ) وما تستناش لغايه ما تكمل فلوس كتير خالص ( سافر في اعلي درجة تقدر امكانياتك تسمح تسافر عليها ) وحاول تختار صحبة ( الصاحب ساحب ولو معاك حد يشجعك حتفرق معاك كتير) وما تقلقش علي الفلوس اللي حتصرفها في الرحلة (معظم اللي راحوا قبل كدا قالوا انهم رجعوا من الحج قبل ما يعدي عليهم السنه كانوا رزقوا اكتر مما انفقوا )
- الحج حاليا من مصر 3 درجات قرعة الداخلية ( اسمه القديم حج القرعة) ودي بتقدم فيها بنفسك سواء في قسم الشرطة للي تابع ليه او مديرية الامن او من خلال موقع الحج الموحد الكترونيا وقرعة الجمعيات ( تابعة لوزارة التضامن وبتحتاج تكون مشترك في جمعية اهلية و تقدم من خلالها ) و قرعة سياحة ( بتشترك مع شركة سياحة وبتقدم من خلالها)
- الفروق ما بين كل نوع في التكلفة و مدة الرحلة و بعد اماكن الاقامة من الحرم وطبعا طريقة السفر (طيران او برى)
- قرعة الداخلية بتكون تقريبا اقل تكلفة فيهم كلهم ( بالنظر الي انها طيران ومدة السفر شهر كامل ) الفنادق بتاعتها بتكون في مكه علي بعد كيلو الي كيلو ونص من الحرم و مفيش وجبات الا في المناسك ( منى وعرفات) غير كدا بيديك كرتونة نواشف ومعلبات ( فول وتونه و عجوة وجبنه وتوست و شاى وسكر ومياه)
- قرعة الجمعيات فيها درجات لكن في المجمل سعرها متوسط ما بين الداخلية والسياحة و مدة الاقامة حوالي 20 يوم و اماكن الاقامة علي حسب الدرجة بس تقريبا ما بين 500-700 متر من الحرم وفيها وجبات طوال الفترة . تعتبر افضل الانواع من حيث قيمة مقابل سعر
- قرعة السياحة ودي فيها طيران وبرى (وقت طويل لكن سعر كويس و اتوبيس ماشى معاك من مصر لحد ما ترجع) و كمان فيها درجات (حسب درجات القرب من الحرم والعدد في الغرف ) ومنها اقتصادي (بينزلوا في فندق قريب اول يومين لعمل العمرة وبعدين بينقلوا لفندق بعيد لحد ميعاد الحج ) مدة الرحلة بتكون من 7-14 يوم تقريبا وفيه وجبات ( ساعات بوفيه مفتوح ) وفيه درجات بتكون صف اول علي الحرم ومخيمات متميزة
- اللي معاه حد كبير وعايز يسافر معاه . الافضل ان الراجل يسافر معاه راجل والست تسافر معاها ست ( لو امكن) لان الغرف مش مزدوجة بمعني الراجل حيقعد مع الرجالة ولو ست هي اللي بتساعده يكون الموضوع صعب ودا اللي بيعمل مشاكل من تواجد الرجال بفرف النساء والعكس وبيخلي الحركة في المناسك صعبه علي الاثنين ومن معهم
- الاكل: مفيش داعى تشيل اكل معاك.لانك لو خايف من التكلفة فالاكل في المجمل مش مكلف اوي هناك ولو علي نوع الاكل كل حاجة متوفرة ولو علي انك ما تنتظرش دور او تقف تجيب فالوقت برضو حيضيع منك في الفندق عشان تقعد تجهز والافضل لو انته مسافر سياحي او اقتصادي ما تاخدش معاك اكل خالص ولو داخلية ممكن حاجات خفيفة بس الكارتونه حتكفيك في الفطار والعشا تقريبا وحيفضلك الغدا ودا عشان تاخد مجمدات معاك لحد هناك مش مضمون مع الجو والتأخير توصل سليمه والتلاجات ساعات كتير بتكون صغيرة او مش بتكفى كل الاكل فخسارة
- الهدايا بلاش . فلوس كتير علي الفاضى لانك لو عايز تجيب لكل الناس حيكلفك فلوس كتير حتى لو الحاجات رخيصة ووزن في المطار و الاهم الوقت ودا اكتر حاجة مهمة هناك. اللي لازم يهادي خلي حد اشتراله من مصر وخلى حاجات بسيطة وسهلة الحمل بس من مكه والمدينة
- ما تكسلش وما تسوفش وحقيقى زيارة ورحلة تستحق وتستاهل
